Tessera caerulea — commentariolum. Numeri cum lineis subscriptis — notae textuales in quinque fabulae lineas. Tessera viridis — translatio.
ACTUS IV, SCENA i 
DR. SHAUS, CIVIS AMICUSAM. Cur sic pigro miser gradu moves stupens,
Dubiusque sese pes in incerto tenet?
Corpus cupis referre progressum licet? 2535
Haeret animus, ponisque nolentem pedem.
Quid triste consilium diu torques, modum
Nec invenis? Quid civium vultum fugis,
Insane? Vince quicquid obstitit, expedi
Mentem tuam, teteque restituas tibi.
DR. S. Heu mihi, animus semet scelere plenus fugit,
Vetat quiescere pectus oneratum malis,
Mentisque consciae pavor. Dolor aestuat.
Animus, <heu> non potest venenum expellere,
Scelerisque mordet saeva conscientia. 2545
Quis, quis coegit daemon adversus mihi
Foedare stupro regis Edwardi thoros?
Heu mihi, tuos, Edwarde, natos prodidi,
Et ore nuncio nefando adulteros.
Tuam coronam possidet iussu meo 2550
Richardus. Hei mihi, voce foedavi mea
Natos tuos. Mendaciis sacra miscui
Et ore scripturas inani pollui.
AM. Cur te ipse poenis gravibus infestus gravas?
Nutritus alias colligit dolor faces, 2555
Renovatque durum nolens sanari malum.
Fraenos capit prudens dolor, et extinguitur.
Vincit dolorem, quisquis eximere cupit,
Et perfidum sanare conatur malum.
DR. S. Praeceps monentem mens fugit, redit statim2560
Concepta frustra consilia repetens. Sequi
Cogit scelus peiora, virtutem timet.
Accendit ipse semet infestus dolor,
Lapsasque vires integrat. Nunquam meas
Cessabit in poenas scelus. Nunquam quies
Nocturna curis solvit aut altus sopor.
Noctu diem voco, repeto noctem die.
Semper memet fugio, <sed> non possum scelus.
AM. Malum nequis sanare?
DR. S.Si possim mori.
AM. At dedecus demi, licet magnum, potest. 2570
DR. S. Nisi turpis haeret usque vestigium labis.
AM. Mors sola maculam demere infandam potest?
DR. S. Foedata nescit vita crimen ponere.
AM. At paenitenti sero parcunt numina.
DR. S. Sceleris novi mater prius natum scelus. 2575
AM. Sanari cessas, qui nimis vulnus times?
DR. S. Sanare non potes facile vulnus grave.
AM. Nulli pepercit quisquis haud parcit sibi.
DR. S. Prius ipse crimen solus accusa tuum.
AM. Absolve te quem iudicas ultus satis. 2580
DR. S. Nemo satis ulcisci scelus dirum potest.
AM. Crimen nimis iudex acerbus vindicas.
DR. S. Nisi mordent acre, foeda sordent vulnera.
AM. Dum cogitas severa, nil curas reum.
DR. S. Dolor doloris est medela. Nescit parcere.
Caelum crimen vidit nefandum, conscia
Tanti fuit dedecoris et tellus vaga.
Ruina mentis foeda tam me disparem
Fecit mihi, ut memet nil fugiam magis,
Et factus infoelix mei sum perfuga. 2590
Animusque serum corporis divorcium
Precatur anxius. Necat quisquis iubet
Vivere, mori quisquis iubet vitam dedit.
Tantum potest placere quicquid displicet.
De me viri quid <iam> loquuntur futiles? 2595
AM. Te sceleris arguunt nefandi conscium.
DR. S. Sed quis tumultus civium isthuc convolat?
AM. Ubi civium regnare iussu coeperat
Princeps Glocestrius, loco primum studet
Rex pius ab illo subditis fari suis, 2600
Ubi voce lex Anglis loqui viva solet.
Nunc ergo ad aulam commigrat Westminsteri
Rex, ut pius legum peritis imperet
Ne prava mens legum minas adulteret. (Shaa departeth.)
Discessit infoelix, pati nec civium 2605
Vultus potest. Huic verba pandam principis.
ACTUS IV, SCENA ii
DUX GLOCESTRIAEGLOC. Iuvabat Astraeae locatum sedibus
Et hoc tribunali tremendo Minois
Auro caput saepire primum fulgido,
Iustaque cives lege regere patriae. 2610
Rex providere debet id potissimum
Ut urbium columna lex firmissima
In curia dominetur aequali potens.
Vestrum domare pectus haud metus decet,
Quorum superbum claruit titulis genus.
Non caeca regnat ira, vinci nescia.
Nunc ense fessum miles exonerat latus.
Omnes amoris vinculo iungere iuvat,
Contempta nec patrum iacebunt stemmata.
Vos laudo patres iure doctos patrio, 2620
Qui continetis legibus rempublicam.
Ne iurgiis lacerata mutuis Anglia
Languescat. Amplo vos honore persequar,
Et mente cives gaudeant lassa licet
E sordidis qui nutriuntur artibus, 2625
Nec causa vos agitata iudici premet,
Nec fera clangore bella perstrepent tubae.
Nam concidunt res prosperae discordiis.
Hinc falsa mens vultu minatur integro,
Hinc omne fluxit civitatibus malum.
Sedabit hos fluctus amor, pietas, fides.
His vinculis foelix cohaeret Anglia,
Quae nec furor contundet <plus> domesticus,
Nec robur hostium potest infringere.
Odii recentis pereat omnis memoria. 2635
Statim mihi Foggum, satelles, libera,
Supplex asylo qui metu nostri latet.
Sit finis irae, nec minas iactet furor.
Summo laborat impetu mens anxia
A subditis vultu benigne conspici. 2640
Heu quam velim fides vigeret aurea,
Tantum vetustis nota quondam saeculis,
Aut quod fucos experta virtus non fuit.
Mox sit deorum numen adversum mihi,
Si lingua mentis fallat interpres suae. 2645
Noli timere, Fogge. Concedas prope.
Sociemus animos. Pignus hoc fidei cape,
Coniunge dextram, et me vicissim delige.
Perge ad Actum Quintum Secundae Actionis