Tessera caerulea — commentariolum. Numeri cum lineis subscriptis — notae textuales in quinque fabulae lineas. Tessera viridis — translatio.
ACTUS TERTIUS 
DUX BUCKINGHAMIAE, CIVES
Let the Mayor come first accompanied with citizens, then the Duke with other nobles: they assemble at Bernhardes Castle.
BUCK. Veneranda civium cohors, quos affatim 2399
Urbs possidet praeclara Londinum, en sua
Iam quisque sponte contulit faustum gradum,
Et quilibet confluxit ordo civium
Ut dempta sceptra adulteris nepotibus
Glocestrio gerenda reddant patruo,
Ne regiam mentita proles inquinet. 2405
He sendeth his man into the palace.
Sed tu prius nostri ducem adventus mone
Ne tantus anxium tumultus illico
Perturbet. Illum supplices cives petunt
Quos Angliae torquent graves casus, sui
Dignetur aditum subditis fidelibus, 2410
De rebus illum maximis dum consulunt.
Ingens onus regni labor, nec allicit
Statim bonos blandum venenum, quos furor
Vexabit intestinus aeternis minis.
En fraude delicatas eligunt domos,
Et nulla cingunt tela principem satis.
Tantumque licet — At popularis sermo premit.
Sed ista quorsum persequor? Quod si pium
Onus coronae cura commendat gravis
Nihilque suspectum facit ducem fides 2420
At metuo ne deterreat, nepotibus
Vivis adhuc, infame regnum patrui.
Honore plenus est. Latere dux cupit
A turbidis semotus invidiae malis.
His servant retourneth and secretly reporteth to the Duke, whom he sendeth againe.
Aditum negat protector, o cives mei,
2425
Tantamque turbam suspicatur, nisi prius
Adventus huius causa quae sit audiat.
Quod magna procerum turba supplex consulit
Cinctusque multo cive praetor, nuncia.
Domesticum torquet malum, quod auribus 2430
Tantum suis sollicita mandabit cohors.
At nos Glocestrium rogemus supplices.
Rogamus immani reluctantem prece
Ut sceptra regni iustus haeres occupet.
Sed nunc duobus cinctus ecce episcopis 2435
Apparet in summa domo princeps pius.
Ah, sola dux divina foelix cogitat.
CIV. O fraude pugnans pervicax audacia
Colore dum ludit alieno, nil timet
Secura. Sed nescire caeteros putat 2440
Tectum malum, sibique blanditur nefas.DUX BUCKINGHAMIAE, DUX GLOCESTRIAE, CHORUS CIVIUM
BUCK. Te civium profusa flagitat cohors,
Excelse praeses, ut tuam de re gravi
Praestantiam alloqui liceret. Afferunt
Ignota regno bona, decus magnum tibi. 2445
Non audet eloqui iussus pios tamen,
Id nisi licere voce testaris tua.
GLOC. Quaecunque mens iussit, licebit dicere.
Publica iuvat decreta scire civium.
BUCK. Diu nimis perpessa plebs tyrannidem
Laetatur haec luxisse tandem tempora
Se pristino quibus timore solveret,
Vitaeque grata sit suae securitas.
De rebus ergo dum coiret publicis
Statumque regni plena civium cohors
Tractaret, haeres unicus, regni decus
Ut vindices sanxere sacris iussibus.
Nec sceptra prolem fratris impuram ferunt,
Iniusta quam matris Venus suae premit.
Nunc ergo turba civium frequens adest 2460
Ut voce supplex publica multum petat,
Ut pristino cives timore liberes
Regnum et sagaci debitum tractes manu.
GLOC. Quam vera cives finxerint licet sciam,
Fratris tamen manes veneror olim mei, 2465
Nec in meos ferox nepotes patruus
Demens ero. Verbisque nec populus feris
Pulsabit iratus thronum quod ambiam
Fratris mei, nec exterae probris simul
Gentes lacessent si dolis patruus meis 2470
Nepotibus regnum scelestus auferam
Aut sceptra tollam dubia cognati laris.
Potius latebo tutus invidiae malis,
Nec caecus animum pulsat ambitus meum.
Satis premunt sceptri propinqui munera.
Vos attamen mihi dixisse non piget.
Cogit potius amor referre gratiam.
Nec vos minus nepotem ametis obsecro
Cuius magis privatus imperium feram.
Regnare qui puer licet novit parum 2480
Laboribus meis adiutus est tamen.
Regni decus puer satis tuebitur,
Viguisse quod nuper magis nemo negat.
Tutela postquam tanta regni traditur
Veterata cessat ira, franguntur minae
Bonoque languent pulsa consilio odia
Partim, Dei sed maximi nutu magis.
Nil sceptra damnet regis, optimi viri.
Debet mihi nomen placare subditi.
BUCK. Da pauca rursus alloqui, o dux inclyte. 2490
Regnare non sinunt nepotes subditi,
Summi vetant proceres, vetat vulgus rude.
Regnum student purgare adultera labe.
Sin iusta regni sceptra non vis pertinax,
At posse flecti nobilem sperant prece 2495
Qui regii splendoris cultu gaudeat.
De rebus hisque quid ergo statuas audiant.
GLOC. Quod invident regnum paternum liberis
Doleo, fratris qui honoro manes mortui.
Utinam queant nepotis imperium pati!
Sed regere populum nullus invisum potest.
Haec quia video statuisse consensu pari,
Regnumque spuriis auferunt nepotibus
Cum iura regni solus haeres vindicem
Quod filius relictus unus sum patris, 2505
Cum sit necesse civibus cedere meis,
Vota sequor. en, regna posco debita.
Votis creari subditorum principem
Magis reor. Curam Angliae accipimus simul
Et Galliae. Rex gemina regna vindico.
Sanctius habenas Angliae princeps regam.
Magis pacata civium quies monet.
Tum nostra discet fraena victa Gallia.
Haec Angliae subacta ditabit decus,
Cuius miser si gloriam non quaererem 2515
Utinam sorores fila rumpant perfidae.
CHORUS Richardus rex! Richardus rex! Richardus rex!
The Duke and noblemen go in to the King, the Mayor and citizens departe away.
CIV. Quaerit colorem triste virtutis scelus.
Pudet sui deforme vultus vitium.
Heu quis secretos nescit ignarus dolos 2520
Et mille patrui machinas? Quis sibi prius
Promissa fratris regna fraude non videt
Dolis petitum publice regnum negat.
Inventa damnat sceptra ficta sanctitas,
Qualis negat bis consecrari pontifex 2525
Qui sacra tamen ambit colenda forsitan.
Talis sua rex sponte compulsus gerit
Erepta pueris sceptra. Sed decet magis
Spectare tantas plebeios tragoedias,
Quicquid libet regi licet, nec legibus 2530
Semper piis rex vota metitur sua.
Crebro iuvat nescire, quod scias tamen.
Perge ad Quartum Actum Actionis Secundae