Tessera caerulea — commentariolum. Tessera rubicunda — nota textualis. Tessera viridis—translatio.

ACTUS II, SCENA i

Chosroes, urbe relicta Philotae, cum Medarse in interiora Persidis oppida fugit.

CHOS. (Solus.) Fecialis iste plumbeo serpit gradu,
Nimium moratur. Forte lugubres timet
Afferre secum nuncios. Nimis cito
Appellit iste, quisquis instantis venit
Index ruinae. Si supercilio negat 435
Fastidioso congredi tecum, tui
Spes nulla regni. Marte si dextro rapis
Opima victor spolia, stellantes feres
Iterum penates vertice. (Intrat Hermes.) Horrificum meus
Praesagit animus nuncium. Gressum movet 440
Hermes trementem, lingua prae luctu stupet.
Responsa solve, quicquid attuleris feret
Bene praeparatum pectus.
HERM. O quantos gerit
Animos, secundo vela cui Zephyro tument!
En verba fastu plena! “Miramur meum 445
Conserere dextram velle captivum. Latent
Adhuc sub isto spiritus tanti sinu?
Ad Heraclii supplicis ritu pedes
Adrepat hostis. Forte si lachrymis suam
Causam peroret, lachrymis vitam dabo.”450
CHOS. Bene est. Tenemus hostis ingenium. Vale. (Exit Hermes.)
“Ad Heraclii supplicis ritu pedes
Adrepat hostis? Forte si lachrymis suam
Causam peroret, lachrymis vitam dabo?”
Ut bulla turget! Sortis ambrosio madens 455
Nimis influentis nectare insanit. Fidem
Ab infideli, stulte, perpetuam rota
Speras? Benignae risui quisqus deae
Crediderit, aurae fidit infidae. Tibi
Blanditur hodie, cras mihi. Instabiles quatit 460
Dea caeca pennas, remige alarum magis
Ventosa plausu. Mene duplicata iubes,
Superbe, sura genua complecti tua?
O pestilentis spiculum linguae! Scies
Quis melius hodie poplitem flectit, cernas 465
Et quis cruento collinet luto prius.
Iniqua si nos astra destituant, nova
Hic cudet ensis fata. Caelicolae, nihil
Debebo vobis. Dextra sit noster deus.

Exeunti occurrit Medarses.

MED. Genitor, citatum quo rapis praeceps gradum? 470
CHOS. Ad ima Ditis stagna.
MED. Morieris, pater?
CHOS. Ut tu superstes Nestoris vincas colum. blue
MED. Quaecunque stamen Parca disrumpet patris,
Eadem Medarsis fila praescindet. Iubes
Numerare Pylias filium aetates, tamen 475
Demetere pergis floridos vitae dies?
CHOS. Ne violet hostis floridos vitae dies
Ad Heraclium propero.
MED. Comitabor patrem.
CHOS. Exeuntis aevi gemma non lutum feret
Adhuc cruentum Martis. Incolumes pete, 480
Fili, latebras.
MED.Egon’ ut imbelles fuga
Subeam cavernas, dum pater honesto †genas†
Vulnere decoram morte venalem petit
Laurum? Paternum pectus hic teget sinus.
CHOS. Vivat Medarses potius, et patris rogo 485
Lachrymis parentet. Ossa genitoris legat,
Urnaque parva Chosroen magnum premat,
Sinuque foveat. Dignior vita, puer,
Est viridis aetas.
MED. Dignior vita, pater,
Est ille,nobis qui prius vitam dedit. 490
CHOS. Pro te libenter spiritum, vitam, omnia
Oppignerabo. Qui semel vitam dedit
Melius secundo dederit.
MED. Ah potius decet
Ut tibi semel det ille, qui nunquam dedit.
CHOS. Ergone Martis aleam ancipitis sedet 495
Mecum experiri?
MED. Stat rudimentum, pater,
Sub te magistro ponere armorum.
CHOS. Sinu
Quid si reducto Chosreos lateat, trucis
Dum detumescat turbinis rabies?
MED. Patri
Quicunque ridet angulus, ridet mihi. 500
CHOS. Potius latebras genitor indecores petet
Quam spes parentis unica hostili cadat
Victimi furori.
MED. Siderum princeps clepit
Quandoque roseas nube Cimmeria comas.
Bene vixit ille qui bene latuit, pater. 505
CHOS. Male vixit ille qui male latuit, puer?
MED. Latuit Achilles.
CHOS. Axe Peliaco tamen
Cum traxit ardens Hectorem et Troiam simul,
Emersit umbri, exuit matris dolos
Rursusque Achilles induit Achillem. Fuga
Sed si Medarsi arridet, arridet mihi. 510
Eamus ergo, nate.

Intrat Philotas.

Peregrino iuvat
Videre mundum sole gaudentem. Iuvat
Amare tenebras, hosticus donec furor
Se mole propria frangat.
MED. Mitibus fave, 515
Olympe, dextris.
PHIL. Caesar, inimico polus
Remugit aere, proprius armorum fragor
Clarescit. Urbem nimbus equitantum velut
Apes coronant.
CHOS. Nate, vertamus solum.
Interea utrumque fulmine, Philota, tuae 520
Defende dextrae. Nostra suspicit salus
Unum Philotam. Tecta cum populis tuae
Committo fidei rursus.
PHIL. Est regis salus
Salute nostra potior. (Exit Chosroes cum Medarte.)

ACTUS II, SCENA ij

Philotas Siroen e carcere educit et regem salutat, qui Nichomachum cum militibus mittit ut patrem retrahat.

PHIL. (Solus.) Ignavum pecus!
Nobisne tantum vulnera relinquis, toro 525
Cum tu supinus stertis Attalico? Fugam
I nunc pudendam carpe. Faemineos vocant
Digitos quasilla, furcifices, fusus, colus
Operosa doctae stamina Minervae. Late
Securus, in nos saeva tempestas suam 530
Dum exercet iram. Faxo latebrosum brevi
Linquas cubile. Propia faxo scias
Defendere nece patriam. Quantos ages,
Fugitive, gemitus, iura cum populis dabit
Siroes, patremque pedibus advolvet suis 535
Humilem, gementem! Stulte, quis tandem tibi
Credere Philotae suasit? Ah quali miser
Fidis charybdi? Tota relligio mea
Cerebri Minervam nube Panchaea colit.
Commissa dextra dexterae, fas, et fides 540
Sunt vacua prorsus nomina, et tantum libros
Habitant Platonis. Ingeni si cui favet
Benigna vena, sortis est suae faber. (Intrat Nichomachus.)
NIC. Gaude, Philota, vicimus.
PHIL. Qui est?
NIC.Lepus
Lepusculusque fugit.
PHIL. Exultim mihi 545
Praecordia micant. (Intrant milites.)
NIC. Promptus en miles tua
Facessere cupit iussa.
PHIL. Coelitibus pares
Agnosco pugiles. Fulmina Gradivi, fores
Servate densi, stringite gladios, novis
Ne forte rebus studeat Euripus levi 550
Levior popellus. Vincla nunc vestro iuvat
Laxare tandem principi.

Aperto carcere prodit Siroes. alcove

Prodi tuae
Spes una gentis, una labefactae domus
Columna. Sacram liceat ah! liceat manum
Exosculari. Cernis in quanta pater 555
Cives Charybdi liquit? En hostis suae
Florem iuventae proprius agglomerat! Fere
Aries aheno verberat cornu latus
Urbis. Gementes interim cives duce
Viduos reliquit genitor egregius. Nec hoc 560
Satis. Medarsen Persici haeredem soli
Scripsit, reclament iura naturae licet.
At tibi tenebras genitor infamis dui
Monumenta amoris liquit. O duram nimis
Haereditatem patris! O regnum Stygis! 565
Meliore regni tempera fraenos manu.
OMNES Meliore regni tempera fraenos manu.

Siroes procumbit in genua.

SIR. Adoro rosei candidum Phoebi iubar
Diu expetitum, semper a duro tamen
Genitore (nomen tale si talem decet) 570
Mihi negatum. (Surgit.) Lucis impatiens adhuc
Caligat oculus noctis implacidae nimis
Adsuetus umbris. Testis est Phoebus tamen,
Sororque Phoebe, totus astrorum chorus
Degenere semper labe dedecoris meam 575
Caruisse mentem. Nuper umbroso fui
Sepultus antro. Quid reviviscam tamen,
Quod luce rursus aurea coeli fruar,
Tuum est, Philota. Tu meus deinceps pater,
Memori Philotae laus perennabit cedro 580
Secura †basti†, dumque posteritas leget
Hoc dulce nomen, vester accendit cinis
Animos nepotum. Naufragum regni libens
Capesso clavum, modo procelloso simul
Luctemur omnes turbini. Frustra tamen 585
Sudare ne cogamur, extingui faces
Discordiarum convenit. Belli caput
Revocetur igitur Chosroes, gressum quoque
Societ Medarses. Magna Nicomachum manet
Merces, utrumque legere si cogat retro 590
Passus eosdem.
NIC. Capita demergant licet
Utervis Erebo, latebra non Erebi teget.
Ambos sub auras protraham rursus.
SIR. Sati
Mavorte pugiles, ite,. Felices iter
Istud secundent alites. Nemo sui 595
Exors redibit praemii.
MILES Pretium sibi
Est ipsa virtus maximum.

Exit Nicomachus cum militibus. Intrant Memnon et Orontes.

MEM. Princeps tibi
Longam precamur purpuram. Divum pater
Concedat.
ORON. Axe segnis aurato dies
Hodierna serpat.
SIR. Ora quid flammat rubor? 600
Quid latera crebro spiritus pulsu quatit?
MEM. Sudoris ista signa sunt nostri.
SIR. Vagi
Nostis latebras Chosroae?
MEM. Comites tulit
Nos duo superemos. Iamque per dumae miser
Et opaca sylvae devios urget gradus. 605
SIR. Cito, cito, rapidis ite per tacitum nemus
Iterum quadrigis. Este Nichomacho viae
Duces. Utrumque Themidis ad sacrae novum
Sistite tribunal.
MEM. Principis nutum Iovis
Sacrosancta veluti iussa veneramur.

Exeunt Memnon et Orontes.

PHIL. Nigram 610
Nunc conclorem luctui, princeps, togam
Depone.Totus veste sinuosa fluat
Gemmifer Hydaspes. Tetricum exhilara diem
Meliore frontis iubare.
SIR. Modo placeat suo
Siroes Philotae, quidlibet faciet. Nihil 615
Sine te salutis vindici ridet mihi. (Exeunt.)

ACTUS II, SCENA iij

Chosroes a Memnone et Oronte proditus cum Medarsi deprehenditur. Entrant <Chosroes et Medarses> habitu pastorum.

MED. Pater, labascunt genua. Praecipitem precor
Suspende gressum.
CHOS. Tuta non iam est mora.
MED. En hospitales explicat Chloris sinus. (Ostendit sylvam.)
Viridante laetus cespite invitat torus, 620
Ambos susurro Zephyrus ambrosio vocat.
Sedeamus illic paululum.
CHOS.Fessis age
Artus reclina, modica non oberit quies. (Sedent.)
O laeta ruris otia! O dulces lares
Dryadum! Loquacis o soporiferum melos 625
Lymphae! Rubentis muricem quis non rosae
Anteferat ostro Chosroae? Innocui forem
O cultor utinam ruris! Insidias ubi
Novere tantum pecora venantum plagis
Exposita. Saevi ludus hinc Martis procul, 630
Nisi quando dulce fronte vix rupta cient
Bellum capellae. Nemo nisi campus ferax
Hic vulneratur, nullus auditur sonus
Praeter trementem garruli rivi fugam,
Ludicraque Zephyri proelia iocantis. Tibi 635
Ridetne, fili, vita pastorum?
MED. Rudis
Pastoris habitus, genitor, haud reges decet.
CHOS. Pastoris habitus,nate, fugientes decet.

<Medarses> ostendit pileum stramineum et pedum.

MED. Quam vile capitis tegmen horrenti rigens
Culmo! Recurvum dedecet manus pedum 640
Ad sceptra natas.
CHOS. Spiritus magnos, puer,
Non ista poscunt tempora. Medarsen exue,
Indue Menalcam. Disce patienter canis
Tolerare flammas, disce Riphaeae pati
Acuta brumae frigora, excipiat novus 645
Labor laborem semper, eversae cupis
Si murus esse patriae.
MED. O genitor, diem
Illumne rosea Phosphorus vehet rota,
Quo Persidis defensor et patriae pater
Volitem per ora civium? Tamen sitim 650
Iovemque quamvis tetricum patiar libens,
Modo illa niveis hora ter faelix equis
Aliquando veniat. St. Quis fragor? (Intrat rusticus.) Fessus gradum
Huc innocentem rusticus torquet.
CHOS. Labrum
Compesce.
RUST. Iam sol ad umbilicum caeli pervenit. Tempus monet ut ampliter 655
Et dapsicate epulemur. Sed quid mihi cum sole vel solariis?
Uterus iste Hercle mihi est commodissimum solarium
Sive enim sol sub nube delitescat sive aperiat,
Perinde est. Uterus namque aurem vellicat et admonet
Praendendi esse tempus.Q uinetiam quod magis est memoriter et
sine ephemeride 660
Verissima denunciat, mihi omnes esuriales ferias.
Sed ninc ad sylvam in vicenia me confero. (Videt pastores.) Sed ecce
pastores. Parum est.
In partem voco. Salvete, iuvenes spectatissimi, nunc vobis volup est
Diem mecum frangere? Pol ego integram adhuc famem ad prandum
Affero. Iam haud dubio virtus est in medio.
CHOS. Quas dapes 665
Nobis opponis?
RUST. Bacchum, Ceream, et mollisculum caseum. (Prodit in medio.)
MED. Nil aliud? Expectabam gallum Numidicum, vel saltem gallinam Persicam.
RUST. quam delicatulus est iste adolescentulus! Nemo dat quod non habet.
Milites gallinas meas suo dudum consecrarunt genio.
CHOS. Ad rem quid boni nuncii affers? Quid tandem Chosroae 670
Fuit?
RUST. Quaestio pol perdifficilis! Nunquam enim hactenus ego
In deorum concilium admissus sum.
CHOS.Ubi est? Quid agit?
Quid molitur?
RUST.Fama est Seleuciam profugum excessisse. Ego
Quid Chosroen terreat sum unice securus.
CHOS. Vidistin’ unquam Chosroen?
RUST. Nunquam vidi, nec multum laboro.
MED. Ego vidi saepius. 675
Videtur mihi bonus rex, quud tibi videt?
RUST. Bonus rex? Tu est adhuc
Puer, nec casa unquam tu calamitatis fuit hospitium.
Non es paterfamilias. Imposterum cum tu vites consereris
Et milites videmicam fecerunt, cum tu triticum terrae mandaveris,
Et tristitiam messueris, cum tu gregem laetis pascuis illi ventrem grege 680
Tuo saginaverunt, cum Harpie istiusmodi foris
Ubique in rem tuam involarent, tum demum scies an Chosroes, qui haec patitur,
Sit bonus rex. (Clangit tuba.) Mecastor, milites. Nequam undique et undique nequam.
Cor meum novas
Deduxit colonias. Vae pecori pecorisque magistris. Nos convascabimus. s
Valete. (Fugit.)
CHOS.Clangit hostis an amici tuba? 685
MED. (Audit strepitum.) Ferale murmur proprius accipiam.
CHOS. Cave
Ne te dolosis hostis illaqueat plagis.
Pulsata solido terra quadrupedum gemit
Cornu, nigrescit nube pulverea nemus.
MED. Fuge, fuge, pater. <Intrat Nicephorus cum militibus.)
NIC. Ubi latet imbellis lepus? 690

Fugit Chosrues et ignarus relinquit Medarsen inter hostes.

MED. Nicomache, siccine principem appellas tuum?
O architectum fraudis! O fallax Sinon!
NIC. Commilitones, verba vos pueri movent?
Excutite latebras.
MEM. Ne metue, presso ferae
Rostro cubile persequar.
ORON. Nunquam mea 695
Effugiet hodie retia.
NIC. Effugit tamen.
Age, da lacertos. Vincula post tergum manus
Stringent retortas.

Alligat manus pastori.

Arborem amplexu fove
Pastor benigno. Lachymis trunci tuas
Adiunge lachrymas. Antra singultu quate. 700
MEM. Sagaciore nare venemur patrem.
ORON. Moxte reviset genitor. Ingreditur sylvam. Exeunt reliqui.
MED.. O scopuli! O nemus!
O muta solitudo! Quid primum querar?
Nostrasne manicas lugubri flebo chely,
An vincla potius patris? Est gemitu lyrae 705
Uterque dignus funebri. Striges ego
Luposque vere regia pascam dape.
Sed corda patris mucro, Nicomache, tuus
Fortassis hausit, mucro crudelis!
CHOS. Veni,
Veni, Medarses, quis modus amori?
ECHOMori.
CHOS. Mori? 710
Eloquere.
ECHO Quere.
CHOS. Nate, vicimus?
ECHO Imus.
CHOS.Luget puer
Exanimis?
ECHONimis.
CHOS. Eheu!
ECHOHeu!
CHOS. Numen quis sedeat dolor?
ECHO Olor.
CHO. (Prodit.) Ignosce, fili. Ferreis palmas ego
Manicis revinxi ferreo cinctum globo
Cum te reliqui.
MED. Potius ignoscat suo 715
Genitor Medarsi. Fons ego malorum. Lares
Dryadum virentes natus, invito patre,
Cum subiit, uno patris et nati sinum
Tranxfixit ictu.

<Nicomachus> in sylva vagentes loquitur.

NIC. Sequere trepidantem cito.
MEM. Praeclude fauces nemoris.
ORON. Ubi tandem latet?
NIC. Hac, hac, satelles.
MILES 1 Video.
MILES 2 Quid vides?
MILES 3 Nihil. 720
MEM. (Invenit, capiuntur.) Bene est, tenentur.
NIC. “Magna Nicomacho suae
Sit cura plagae.” Verba meminisiti? Meo
Nunc ego medebor vulneri.
CHOS. Regis sacram
Nonne revereris purpuram?
NIC. Regis sacram
Quando exuisti purpuram, regem quique 725
Tunc exuisti. Rapite, praecipitat dies.
CHOS. Quid hoc? Orontes proditor? Fidem quoque
Memnon fefellit? Ipsi ego fidei fidem
Amplius habere nolo.

ACTUS II, SCENA iiij

Siroes Zachariam e carcere educit, oratque ut sit pacis sequester inter se et Heraclium. Patrem fratremque reduces carceri, in quem ipse olim detrusus est, adducit.

SIR. (Educit e carcere.)Gratiamur tibi,
Venerande praesul, lucis usuram novae. 730
Graveolentis antri claustra, tenebrarum chaos,
Horror, catenae pondus et stridor, solum
Cubile, parcus somnus, et nullus cibus
Quam sint molesta novimus. Novi quoque
Quid sit sepultum vivere.
ZACH. Agnosco tuam, 735
Auguste princeps, indolem. Duro patre
Immane quantum discrepas! Nodis mihi
Genitor ahenis membra constrinxit, meas
Sed tu resolvis compedes. Donec mei
Memor ipse fuero, tamdiu Siroae favor, 740
Benefacta Siroae mente sculpentur mea.
SIR. Citius lacertis vincla dempsissem, nisi
Nos arcuisset carceris proprii rigor.
Haec sunt parentis dona. Ne Siroen tamen
Spelaea sontum sorbeant rursus, meae 745
Sis tu salutis auctor. Irati potes
Sopiri fulmen Heracli. Mollis mihi
Per te sit aditus principi. Inprimis doce
Me supplicantum more, sollicita prece
Orare pacis dona. Si dederit, crucem 750
Me quoque daturum.
ZACH. Pacis amplector libens,
Auguste, partes. Nemo non tanti velit
Orator esse principis.
SIR. Faveat tuis
Fortuna caeptis.

Exit Zacharias.

Nutat infesto ratis
Deprensa ponto. Scylla mihi dextrum latus, 755
Laevum Charybdis obsidet. Nobis duo
Scopuli minantur. Heracli una instat furor
Favore Martis ebrii, hinc patris minae
Exulcerati. Forte tendiculas quoque
A me paratas transilit. Totam ciet 760
Fortassis in me Persidem. Veniat. Comas
Non incruenta vinciet lauru. Novum
Hic Heraclium sentiet. Siroae nigram
Si Lachesis horam nunciat, nunquam tamen
Inultus hodie concidet. Cadam libens, 765
Modo cadat etiam Chosroes. (Intrat Philotas.)
PHIL. Princeps, sinum
Distende totum gaudio. Laqueis ferae
Clausis tenentur.
SIR. Ambo redierunt?
PHIL. Pater
Natusque subeunt regiae limen domus.
SIR. O me beatum! Caelitum nolim meae 770
Mutare sortem sorte. Bipatentes cito
Valvae dehiscant. Urna fatalis vocat
Sontes.

Inducuntur Chosroes et Medarses.

Ovino vellere teguntur lupi.
Nostine qui sim? Forte tenuavit genas
Squallentis horror carceris.
CHOS. Vultum satis 775
Siroae superbum norimus. Dudum mihi
Praesaga caeli lingua portendit trucem
Orbis cometen.
SIR. (Abiicit petasum.) Capite quoque tecto vomis
Maledicta, stipes?
MED. Genitor, ad Sirae pedes
Abiicere nos non pudeat. Est haeres tuae 780
Verus coronae. Crine cur sedet meo
Diademo fratri debitum? Fateor, tuli
Fratris coronam vertice invicto. Pater
Liceat fateri crimen. (Retrahit natum genua flexurum.)
CHOS. In tanta patrem
Linquis Charybdi, nate? Tu Siroae quoque 785
Transfuga sequeris castra? Quo pietas, fides,
Quo iuncta dextre dexterae cessit? Patri
Ergone Siroes praenitet?
MED. Nomen patris
Est dulce nomen, Facere quod vetat pater,
Licet ipse cupiam, nequeo.
SIR.Si flecti tumor 790
Pueri procacis non potest, frangi potest. (Flectunt ambo.)
CHOS. Ah! Potius ipse frangar, et memet minor
Ad genua nati supplices tendam manus.
Me duplicato poplite abiectum vides
Primus, parentem primus ad nati pedes. 795
Non torva mortis ora me terrent, nigrum
Exosculabor spiculum, calamus modo
Parcat Medarsi ferreus. Fateor nimis
Acerbus in te Chosroes semper fuit.
Sed cur Medarses, cor mei cordis, mali 800
Delicta patris expiet?
MED. Merui necem
Diadema fratris cum tuli. Moriar libens,
Modo sit superstes genitor. Ah! Vitam patri
Restitue, frater, qui tibi vitam dedit.
Si fote peccat genitor, ignoscas. Nimis 805
Amando natum peccat.
SIR. (Tergit lachrymas.) Invitum puer
Lachrymare fratrem cogit. Adamanti potest
Exprimere lachrymas fratris et patris dolor
Unanimis. (Ad audientes.) Ecce quomodo in liquidas abit
Uterque lymphas! Fletus amborum mihi 810
Emollit animum. Luctor, obluctor, tamen
Natura sese prodit. Haud facile potest
Dediscere animus quod diu didicit. Meas
Sed strangulabo lacrhymas. Carcer meae
Nuper catenae conscius furvo tegat 815
Utrumque gremio, donec ad nostram Themis
Rursus tribunal evocet. (Rapiuntur. Manet solus Siroes.)

ACTUS II, SCENA v

Siroes Philotae et Nicomachi impulsu fratrem patremque tollit. Heraclium in urbem invitare statuit.

SIR. Qualis ratem
Tumido crepantem carbaso, pleno Notus
Propellit ore, rursus adverso tamen
Refertur aestu, talis ancipiti meus 820
Est hinc et illinc animus Eripo natat.
Siccone poteris lumine paternum miser
Spectare caedem? Lucis auctorem tuae
Viduare luce poteris? Ah, melius, dolor
Insane, loquere. Quid? Salutiferum trahet 825
Paricida caelum? Putido Phaebi iubar
Contaminabit spiritu? Vivet, specu
Et me sepeliet rursus infami? Situs
Paedorque diri carceris non tam cito
Mihi exciderunt. Haeret in oculis adhuc 830
Informe barathrum: compedes, tenebrae, fames
Adhuc recursant. Regiam capitis notam
Rapietne nostri, fratris ut decoret comas,
Impune? Corda quid crebro micant
Saltu? Quis intus monitor audacem iubet 835
Ponere furorem? Videor internam mihi
Haurire vocem facta culpantem mea.
Vox est amoris. Loquitur, at surdo canit.
Iterum liquescit animus, excedit dolor.
Pietas furorem, iudicem natus fugat. 840
Utrum ex duobus candida absolves nota?
Parces Medarsi? Dignus est Pylia puer
Videre saecla. Genitor occumbet? Patrem
Praeferre fratri iura naturae iubent.
Utrique nequeo parcere, ignoro tamen 845
Quem perimet ater calculus.

Intrat Philotas et Nicomachus cum militibus.

PHIL. Princeps polo
Dilecte, dubia quamdiu lentum manus
Suspendit ictum?
NIC. Dextera imitetur Iovem,
Sed fulminantem.
SIR. Fulmen in patrem cadet?
PHIL. Fratremque pariter. Sceptra Persarum cupis? 850
SIR. Cupiamne quaeris? Frigidum verbum nimis!
Est summa voti. Flagro, succendor, vapor
Sum totus, aures quando titillat meas
Hoc dulce nomen.
PHIL. Sceptra cum vita nisi
Prodigere sedeat, metere ceu fungos decet 855
Utriusque capita. Mobili vulgo nihil
Mobilius.
SIR. Ergo vel sceptra vel patrem mihi
Perdere necesse est? Mille mergantur Styge
Patres, parentum busta modo sceptrum creent.
Barathri dehiscant ora tenebrosi. Suos 860
Expediat arcus miles.

Educuntur e carcere.

Expectat forum
Plutonis ambos. I, superbifico deos
Imitare tonitru, fulmina. Sinoen pede
Protere tumenti, regiam muta specu,
Diadema vinclis. Iam poenas dabis. 865
MED. (Flectit.) Parentis anima morte redimatur mea.
Solus Medarses accidat. Placet tuum
Solus furorem.
CHOS. Nestoris potius colum
Meliore filo, nate, transcendas. Tamen
Si sedeat animo patris cineri tuos 870
Miscere cineres, primus occumbam, mori
Et te docebo.
MED. Frater —

Supplex ad pedes Siroae accendens reiicitur. Ad pedes erigit Chosroes.

CHOS. Ad Siroen
Quid supplicantum more prostratus iaces?
Stantes oportet emori reges. Patrem
Imitare stantem. Chostroen nunquam, puer, 875
Iterum videbis supplicem. Nimis fui
Abiectus hodie.
SIR. Spirat ingentes adhuc
Bellator animos. Miles, indomitum doma
Fastum. Sagittam tende fatalem, simul
Dum flexa coeant cornua. Superbus tui 880
Sit meta calami Chosroes.
MED. (Stat ante patrem.)Me, me feri.
Ibo, ibo, patrem lateris obiectu tegam.
Arundo nati sanguinem bibet prius
Quam dulce patris chalybe degustet latus.
SIR. Removete puerum.
MED. Siste fatiferum, precor, 885
O siste iaculum!
CHOS. Nate, postremum vale. Oh!
SIR. Habet, peractum est. Digne meliori puer
Parente vives.
MED. Saevus Busiris! Patri
Egon’ ut superstes regium Siroae iugum
Cervice subeam? Nobilem potius patris 890
Comitabor umbram.
SIR.Cerne genitorem. (Ostendit sagitta fossum.) Placet
Faciesne lethi?
MED. Genitor, exanimum licet
Adoro vultum. (Flectit.) Totus augusto sedet
Gradivus ore. Vivit etiamnunc dolor
Minaeque frontis, et supercilium Iove 895
Dignum supremo quod timet Siroes adhuc.
Sed hiulca plaga pectoris pectus mihi
Transadigit.

Educit sagittam e vulnere.

Ille calamus est, calamus tui,
Siroes, amoris? Vade paricida, impios,
Abominandos effer e tecto pedes. 900
SIR. Pluvia tonantes excipit Iovis rotas
Fletusque linguae fulmina. Age, plora, geme,
Submerge lachrymis lumina. hIllachrymabilem
Siroae furorem senties.Totum sinu
Consume iaculum, lictor, audacem puer 905
Audax sequetur Chosroen.
MED. Sequar patrem
Per aspera Lethi nemora, per quicquid domus
Tenet inamoena Ditis. Age, metam vides.
Quid contremiscis, lictor? Impavidum feris.
Ad expetitos, genitor, amplexus volo. (Occiditur.) 910
SIR. Nunc sceptra patris teneo securus. Manet
Inusitatus Persici imperii gradus
Utriusque merita.
PHIL. Summe votorum foret
Animam litare principi.
NIC. Virtus sibi est
Satis ampla merces.
SIR. Agite, quo melius meum 915
Firmatur ostrum, sponte Palladia comas
Redimitus umbra, regna cum populis, pedes
Ante Heraclii ponere statutum est.
PHIL. Ducis
Mellita bonitas supplices sinu fovet. (Exeunt.)

Perge ad actum tertium